2014年10月28日 星期二

第一次獻給你

大家好,經過這半年來的思考,今日決定開始寫我的 blog。其實我對 blogging 無乜大興趣,不過大半年前見到葉朗程的專欄,覺得幾得意,而我又想回應吓佢寫嘅嘢,咪試吓寫。簡單啲講,我應該係葉朗程故事裡嘅對口單位。希望可以透過呢個 blog,俾大家睇吓上流社會嘅權力遊戲。

首先介紹一吓自己先,我叫陸世宏,英文名叫 Warren,出生於香港,單身兼長子,今年三十有四(就快三十五)。我係典型八十年代長大嘅人,小學讀11區校網名校,但係因為怕97,舉家移民加拿大溫哥華,去咗幾年但係又回流返香港,結果就入唔番本地學校,被放逐去國際學校,之後懵吓懵吓考到去美國讀大學。所以如果有錯別字,請大家見諒,畢竟我喺番書仔一名,不過我又唔想為咗溝女,出賣民族話自己係咩嘢半唐番竹升仔揾食。

上天對我好好,俾我喺一個好充裕嘅家庭長大,細個唔使憂,做乜都符符碌碌過到骨搞掂,大學畢業後出去做過幾年 investment banking,現在掌管家族生意,都算喺話得事果隻,屋企檔嘢話大唔大話細唔細,做邊行費事講啦,總之係 Listco。工作叫做幾休閒咁。我份人比較低調地高調,間唔中上吓報紙雜誌呀咁樣就OK,俾我有得 post 吓 Instagram 呃 like, 不過一定唔喺娛樂版緋聞果啲。總之我就係一般人眼中好典型嘅商界財俊 stereotype 啦。

因為生意關係,我經常同啲 private banker 往來,我是好幾間 private bank 的客戶,經常出入ICC, IFC 裡面啲私人銀行,生意夥伴,朋友等等都有幾多係名流。不過,大家請記住,這些人大部份都係高調地高調的,所以與小弟嘅作風唔同。如果用娛樂圈嚟比喻呢個上流社會,我就係王菲,係 specifically 1996年果個王菲,我行我素但係尚未走火入魔。

閒時我極少落老蘭,因為已經嚴重MK化,要蒲當然係去我啲 friend 嘅私竇(例如老蘭垃圾站附近 basement 有一間喺要㩒密碼入嘅呢)同埋船河P啦。基本上我唔鍾意港式嘅夜生活,因為太無聊喇,就好似威靈頓街頭晚晚都喺停住果架林寶咁,見得多悶㗎嘛,人地堅有錢果啲係坐司機揸嘅 Alphard 㗎。

好啦,現在已經係夜深,聽日十點要返工,早唞各位!






3 則留言: