起跑線上的真理

琴晚好大約咁講咗關於在下嘅背景，今日就等我為大家探討吓起跑線呢樣嘢。

不過首先要訂下一啲 house rule，小弟是典型的商家佬，政治正確兼中立，有如在歐盟中間的小瑞士一樣不問世事，唱山歌揸吓牛奶食吓 fondue，但係中立得嚟都會跟大方向走，始終生活是現實的，西瓜靠大邊嘛。所以大部份情形下我係唔會點討論政治，唔該各位佔領中女的支持或反對者請移玉步到城市論壇討論，同啲維園阿伯 discuss 點樣佔領吓啲中女。

言歸正傳，首先，我係相信人人平等呢樣嘢，除非喺不幸地天生有缺陷或疾病，否則大家有手有腳認該自食其力。當然，我身世託賴喺比較好，你可以話我講緊啲風涼話，不過我要話你知一件事實：我們全部都輸在起跑線上，包括我在內。

嘩呀渦輪兄，你講嘢呀？連你都輸在起跑線上？

為何連我都會輸在起跑線？好簡單。我住馬己仙俠道，無錯，海拔百多米的半山已經是很好的地方，但係山頂啲乜嘢X巒呀，天比高呀，大佬，人地個客廳張用嚟放腳嘅 Ottoman 都離海圖基準面有成 200公尺高啦，高過我大廈天台。其實住半山班友係最慘，比上嚴重不足，比下叫做有餘咁講啦，好多人死充打腫塊面有苦自己知。

論身家，我地全香港嘅男人都輸喺兩位人兄之下：李澤楷同埋四叔次子李家誠。點解？人地一個 Isabella 一個徐子淇，兩位成功地私有化我們的2000年代女神，收晒我地皮啦，學呀盛先生講，呢兩位公子眾所9知真係高層、靚仔、有錢。不過如果兩位公子去到海外，亦都會俾人收皮，啲杜拜油王閒閒哋一個油田都多過佢兩位。

起跑線呢個名稱，其實係自我安慰的，根本係啲葡萄人士作出嚟嘅 term。好似跑馬一樣，你要攞隻四班馬同隻爪皇凌雨比喺徙氣的，但如果攞爪皇凌雨同隻世界名驅 Seabiscuit 比，又係徙氣。所以大家搵低過萬四蚊嘅朋友不用氣餒，一山還有一山高，人比人比死人。我地呢啲活在社會比較高少少位置嘅，同大家一樣都喺搵食啫。我覺得做人最緊要喺係自己個 comfort zone 裡面建立好基礎，即係我要做四班馬裡面最好果隻，然後先去試吓同啲三班尾嘅馬試吓閘，感受吓人地點成功先，吸取吓經驗再慢慢上位。你喺P牌仔夾硬開部 Formula 1 跑車，係會車毀人亡的。

冇錯，有錢喺易識靚女靚仔啲嘅，不過溝女這 topic 太深奧，改日再詳談。

所以唔好再話我喺含住金鎖匙出世，我冇乜嘢叻過你哋。所以由呢個 moment 開始，唔該大家忘記我的富二代身份。

咁樣大家平起平坐係唔係好傾啲？