見報

小弟暫時係會以不連貫的短篇來寫吓嘢，同埋要整靚啲個 blog website，所有嘢 under construction 沙塵滾滾所以請見諒。我最上一次玩HTML係 Geocities 年代呀，十年前喇。

今晚就簡短啲講吓見報見傳媒呢樣嘢。

我個大陸 partner 成日同我講： 世宏兄，要成為業界領導者，需要爭取話語權呀，你呢，開記招做訪問時常常躲在一旁，不行呀，人家搞地產的C公子比你利害耶，你看！圖片多大！

我看見是他旁邊的F小姐。

我感覺到很煩厭，反問了他：郭總，如果明天福布斯找你，你想登上中國富豪榜嗎？ 郭總面青了，拎晒頭。當然啦，上咗 Forbes 會被整頓的。世界很簡單，人們總是愛棒打出頭鳥。

香港有本嘢好睇過壹周刊娛樂版，不過要識雞腸先睇得明。呢本就係 Hong Kong "Butler" 喇。（要用花名，費事幫人賣廣告）價錢為五十幾蚊，如果唔想磅水可選擇去養和門診部或機場的Business Class Lounge 免費閱讀或撻走。想做上等人學 name dropping 呢門高深技術呢，就要勤力期期睇喇。

這本雜誌主要 cover 以下名人：

1. 嫁了鬼佬而急不及待對外宣佈的中年港女及其混血兒女。他們會很快地剷走自己的 Chinese maiden name，變成外國人。"Hi, my name is Mei-Ling Von Estenberg" 個名咁 high 幾好聽呀！啲混血仔女混得咁靚當然要演吓出嚟俾人知啦。

2. 鍾意開重口味奇裝異服Party 的家族及其異形朋友;

3. AB君及其繁衍不盡的同母系表兄弟姊妹姨媽姑爹。總之持有股權就算係家族成員啦;

4. 幾位喺U記, D記 及 C記坐神台位等出糧但係鍾意去ball 嘅 private banker。

還有很多的二打六及擦鞋仔不作介紹。

以上啲人兄好似俾咗贊助費咁，期期 Butler 都有登，真係服咗佢地。其實，細心諗吓，佢地個樣每個月都會喺養和門診部，被上千隻布滿細菌嘅手指指點點，啲人邊打噴嚏一邊譏笑，然後月尾阿姐掉落垃圾桶，咁樣去周圍揚自己個樣值得咩？

所以呢，都係低調地高調好。