低調地高調的基礎

對唔住呀，weekend 出去玩唔得閒寫網誌。

又收到啲朋友們嘅問題，問點解我寫啲嘢咁 random？第一，我話咗我寫嘢係短篇咁樣寫，看起來雜亂無章，但係有啲嘢係會 interconnected。關於上一篇文，我當然無問人地識唔識打麻雀啦，我只不過係幽呀葉生以前篇文一默。不過，我真係有車果位太太，因為交通太差了，而我覺得我架車有位同埋又係上山，幫助吓別人唔好咩？我幫襯了支持佔中的阿信屋，但卻為佔中而影晌到的太太感到難過。相信好多香港人都係站立在這 crossroad。

好喇，weekend 玩咗乜？去 wakeboard？ 多謝喇，喺香港 wakeboard 簡直係攞苦嚟辛，第一啲水太過污染了，第二，揸快艇果班友真係攞人命的，每週末深水灣，清水灣，西貢等海域wakeboard Jet-ski 香蕉船亂Q咁飛，仲忙過港澳碼頭。小弟有二級遊艇船主牌，成日見到驚險場面，差啲俾人隊過添。Afterall, 玩 wakeboard 都係為咗 post Facebook 呃 like，尤其是中年男女最多人玩，因為人到中年要尋找刺激，突出自己嘅 adventurous and fun personality，但係亦透露自己的年紀及不濟的身材，高調的活動也。

星期日梗係去跑馬啦。呢樣就真係可高調或低調的活動。高調者有如阿叻，染個紫色頭入場，老遠都望到啦。低調者可以躲在會所內食嘢落飛涼冷氣。我呢，就係喺中間。得閒落沙圈睇吓隻馬，大螢幕會隱約出現我嘅身影，但係躲在人堆裡，唔好被影到近鏡。琴日朋友隻馬出，係沙圈度同呀苗生傾咗陣計。呀 Tony 同埋 Beverly 我識咗好幾年，雖然而家冇馬喺佢度，但係都會嗲吓幾句，阿吳生徐生我都熟嘅。

跑馬嘅好處係，基本上你嘅同輩，uncle auntie，業務上嘅朋友全部都會喺度，啲聯誼活動一次過進行晒，而不需專登 post 上 facebook 但亦都俾人睇到你出入社交場所，所以為之低調。仲有，如果有海外嘅女仔 friend 梗係要帶去睇馬啦。佢地會覺得好玩好食好得意，落去沙圈直情癲咗咁影啲馬仔。我試過帶我啲北歐同學，嘩，成班金髮女郎狂 selfie，又要捉住呀練馬師騎師影合照，真係夠觸目，氹到呀靚仔騎師超級落力跑到個第二，而我又有獎金袋，簡直喺一石N鳥之計謀，如果拉頭馬就仲好玩啦，攞正牌高調，借故嚟個 afterparty。

此乃低調地高調的基礎：使用現有的東西及資源加以善用，創造獲利條件。簡單啲講，係以唔增加任何 opportunity/marginal cost 而製造 noise。好多人話入馬場賭馬會輸錢，但係個 spending control 喺你自己度。我賭極都係幾十蚊，贏咗一樣咁叫，輸咗一樣咁小人，然後返上去 buffet 食多幾杯 Haagen Dazs 補番數。要 optimize opportunity cost 嘛。